1Ti 3 | DOB | STEP | Ona'ai'aila, 'eguma yaita nuwanuwana be 'ietoanugana, nate paisewa bobo'ana,

1 Timothy 3

Toanuganao 'idi guinuwa

1 Ona'ai'aila, 'eguma yaita nuwanuwana be 'ietoanugana, nate paisewa bobo'ana, 2 ta 'ana loina gete nadigega: 'ina bubuna bobo'ana, mwanena 'ebweuna namo, nigeya bwasi waiwai 'ida numanuma diidiga, ma ina sinasinapu ta ma 'ana 'amayaba, be 'owagao 'adi to'ita'i'ita, be tauna toe'ita bobo'ana, 3 ta geya'abo bwasi waiwai 'inumanuma kabaleya, be wate geya'abo 'igamwagamwasowala, ta esi 'ina bubuna ma'anuwaena, ta nigeya 'ida egewagewana, ta geya'abo esaesa 'ena 'ina yala 'isa'usa'u. 4 'Ilobwenena be tauna 'ina anuwa 'ana tomiyanao 'ida anugana 'ai'ailedi, be 'enega natunao ma idi 'amayaba 'ina ona sida nono. 5 Ta 'eguma tai nigeya sawesawenaya natunao 'iloina palupaluyedi, tauna nigeya sawesawenaya be Yaubada 'ina toekalesiyao wate 'iloina palupaluyedi, aga? 6 Ta geya'abo toemisa auwauna waesiesinuwe be 'ietoanugana, 'abona nai 'ina nuwatu'e 'enega 'ibebe'u, nadigega Seitani nuwatu'e 'enega lowa 'ibe'u.

7 Toanuganao nidi 'ilobwenedi be ma 'adi 'awabobo'ana taudi nigeya totapwalolo matadiya, manuna 'eguma tomota toanuganao si'awa to'umaliyedi 'idi bubuna manuna, nate 'atuwa Seitani 'ina sikwa 'ena si'ona'ona.

8 Dikoniyao wate 'ilobwenedi be sibubuna bobo'ana ma idi nuwanuwa palupaluna, ta geya'abo bwasi waiwai sinumanuma diidiga, be geya'abo esaesa 'ena 'idi yala sisa'usa'u, 9 ta 'ida tapwalolo 'ana mwalatoi kwaikwaiyina sida giyai'i'isi, ma idi nuwanuwa bobo'ana. 10 'Enega 'eguma 'aidi tai nuwanuwami be waesinuwedi be siedikoni, nugana 'idi ematamatana waduneye, be 'abo sibubuna bobo'ana, 'enega siedikoni.

11 Mwanediyao wate ma idi nuwanuwa palupaluna, be geya'abo gosediyao si'awa'awa to'umaliyedi, ta geya'abo bwasi waiwai sinumanuma diidiga, ta esi sida gwaunuwa 'ai'aila. 12 Dikoni mwanena 'ebweuna namo, ta natudiyao be 'idi susuyao sida anugana 'ai'ailidi.

13 Dikoni nidi 'eguma sigwaunuwa, 'enega tomota si'awa bobo'anedi, ta wate Yesu 'ana emisa manuna sida toolopa'ala.

14 Yanuwayaina 'aene tuta gidalina be yawawa 'emuya, ta nugana 'imu leta gete ya'etoladinawa, 15 be 'eguma yasoso'i, leta gete 'enega 'umwalatoni to bubuna 'abo'ada totapwalolo 'ilobweneda, tauna 'ida Yaubada mayawasina 'ina boda solanaya, manuna 'abo'ada toekalesiyao 'ina e'ita 'ai'aila 'ana to'ita'i'itao. 16 Ona'ai'aila, 'ida tapwalolo 'ana mwalatoi kwaikwaiyina, ta yage sinabwana Keliso manuna gete:

Ni'atu 'ietomotai,

ta yaluyaluwana 'enega 'iewaiwai,

ga aniloseyao si'itena,

ta tetelina sena yauyaudi sinonona,

ga me bale'u 'aidi siemisena,

ta muliyega 'itu'e sena esaesa 'ena.